راگەهاندنا زانکۆیا دهۆک؛ ١٠ـی کانوینا ئێکێ ٢٠٢٣
د چارچۆڤێ پرۆژێ (پشتەڤانیا پێرابوونێن کەلتۆریێن رەسەن ل دەشتا نەینەوا)، ئەوێ زانکۆیا دهۆک ب هەڤکاری دگەل رێکخراوا USAID ئەنجامددەت، ئەڤرۆ رێکەڤتی ١٠ـی کانوینا دووێ ٢٠٢٣ و ب ئامادەبوونا د. داود سلێمان ئەتروشی سەرۆکێ زانکۆیا دهۆک، سیروان رۆژبەیانی جێگرێ پارێزگارێ نەینەوا، خانم لارا یۆسف رێڤەبەرا ناحیا ئەلقۆش و نوینەر و کاربدەست و کەسایەتیێن پێکهاتەیێن هەمەجۆرێن دەشتا نەینەوا و شاندەکێ مامۆستا و کاربدەستێن زانکۆیا دهۆک، پێشانگەها کەلتۆری یا ب ناڤێ (هێزا مە د هەمەجۆریا مە دایە) ل هۆلا (المحبە) ل دەمژمێر ١٠ـی سپێدێ ل ناحیا ئەلقۆش هاتە ڤەکرن.
د رێورەسمێن ڤێ پێشانگەها کەلتۆری دا، سەرۆکێ زانکۆیا دهۆک د پەیڤەکێ دا باس ل گرنگیا پشتەڤانیا هەمەجۆری و پێکڤەژیانێ و ساخکرنا کەلتۆرێ زەنگینێ دەڤەرێ کر و بەرهەڤیا زانکۆیا دهۆک دیارکر بۆ ڤێ ئارمانجێ، کو ئەڤ پرۆژێ مەزن یێ زانکۆیا دهۆک پشکەکە ژ ڤێ بەرهەڤیێ. ژ لایێ خۆ ڤە سیروان رۆژبەیانی جێگرێ پارێزگەها نەینەوا د پەیڤا خۆ دا سوپاسیا زانکۆیا دهۆک کر بۆ ڤێ دەستپێشخەریا مەزن و دیارکر کو نەینەوا یا هەمیانە. هەروەسا رێڤەبەرا ناحیا ئەلقۆش ژی سوپاسیێن گەرم ئاراستەی زانکۆیا دهۆک کرن بۆ ڤی پرۆژێ گرنگ و هەماهەنگیا ژ هەژی دگەل لایەنێن دەڤەری. پاشی د. نەشوان شەوکەت رێکخەرێ پرۆژەی، قۆناغێن ئەڤی پرۆژەی بۆ ئامادەبوویان دا نیاسین و دوو کورتە فیلم ل دۆر ڤێ یەکێ نیشاندان.
پشتی رێورەسمێن دەستپێکرنا پێشانگەها کەلتۆری، زارۆکێن قۆتابخانێن ئەلقۆش یێن ژ پێکهاتەیێن جودا تابلۆیەکێ هۆنەری ل دۆر پێکڤەژیانێ پێشکێشکر، کو بۆ ئەگەرێ داخباریا ئامادەبوویان و ب گەرمێ دەست بۆ قوتان. ئەڤی تابلۆی ئەو یەکە دا دیارکرن کو نفشێ نوی دێ بیتە نموونەیا پێکڤەژیانێ.
د ڤێ پێشانگەها کەلتۆری دا، بەرهەمێن شێوەکاری یێن دەربڕینێ ژ کاودانێن سەختێن دەڤەرێ ل سەردەمێ داگیرکرنا مووسل ژ لایێ رێکخراوا تیرۆرستی یا داعش ڤە و هەروەسا کەلتۆرێ جوانێ پێکڤەژیانێ هاتنە نیشاندان، زێدەباری بەرهەمێن ناڤخۆیی و دەولەمەندیا دەڤەرێ ب تایبەتی ژ لایێ بەرهەمێن چاندنێ ڤە، دیسان بەرهەمێن کارێن دەستی و پۆستەرێن رێنیشاندانێ د بوارێ چاندنێ دا، زێدەباری خوارنێن کەلتۆری ل دەڤەرێ. کو باوەرنامێن رێزگرتنێ بۆ پشکدارێن پێشانگەهێ ژ لایێ زانکۆیا دهۆک ڤە هاتنە پێشکێشکرن.
ل دویماهیا ڤێ پێشانگەها کەلتۆری، تیپا مللی یا بەحزانی، تیپا سریانی یا هۆنەرێن مللی یا بەغدیدە قەرقۆش و تیپا ئۆرشینا یا فۆلکلۆرێ شەبەکی؛ سێ تابلۆیێن هۆنەری و سەمایێن فۆلکلۆری ل دۆر تایبەتمەندیا ڤان پێکهاتەیان پێشکێشکرن، کو ئەڤ جوداهی و تایبەتمەندیە وەکو دەولەمەندیەک بۆ ڤێ دەڤەرێ دانە دیارکرن.