ب هەلکەڤتا ڤەکرنا پشکا شینواران پەنەلەک لدۆر پێشڤەبرنا شینوارناسیێ ل زانکۆیا دهۆک هاتە گێران
Feb. 7, 2022, 7:17 p.m.

   ئەڤرۆ رێکەڤتی ٧/٢/٢٠٢٢، پشتی رێورەسمێن ڤەکرنا پشکا شینواران ل کولیژا زانستێن مرۆڤایەتی یا زانکۆیا دهۆک، و ل هۆلا خەلەفێ زێباری ل سەنتەرێ قوتابیان، و ب ئامادەبوونا هاریکارێن سەرۆکێ زانکۆیێ و هژمارەکا مامۆستایان و قوتابیێن پشکا شینواران، پەنەلەک ب ناڤونیشانێ (وەرارا کەرتێ شینواران ل پارێزگەها دهۆکێ) ژ لایێ پشکا ناڤبری ڤە هاتە گێران.

    بەری دەستپێکرنا پەنەلی، د. ئەحمەد محەمەد سالح، هاریکارێ سەرۆکێ زانکۆیێ پەیڤا سەرۆکاتیا زانکۆیا دهۆک پێشکێشکر و گۆت: " ڤەکرنا پشکا شینواران ل زانکۆیا دهۆک پێدڤییەکا گەلەک گرنگ بوو، ژبەرکو ئەڤ خاکە جهێ شارستانییەتێن دێرینە و هزاران جهێن شینواری لێ هەنە کو تا نوکە نەهاتینە هەلکۆلان. لژێر ڤێ خاکێ دیرۆکەکا رەسەنا مرۆڤایەتیێ هاتییە نەخشاندن". ژ لایەکێ دی ڤە هاریکارێ سەرۆکێ زانکۆیێ پشتەڤانیا سەرۆکاتیا زانکۆیێ بۆ پشکا شینواران دیارکر و گۆت: "بەرهەڤکرنا هەلکۆلەرێن کورد ژ لایێ زانکۆیا دهۆک ڤە دێ بوها و کارتێکرنەکا مەزن هەبیت. ژبەر ڤێ یەکێ، ئەم وەکو سەرۆکاتیا زانکۆیا دهۆک دێ پشتەڤانێن سەرکەڤتنا ڤێ پشکێ بین وەکو پشکەکا زانستی یا نوی، تاکو بکەڤیتە لسەر رێگەها خۆ یا دروست".

    پاشی د. ژیار سدیق رەمەزان، سەرۆکا پشکا شینواران باس ل گرنگیا هەبوونا ڤێ پشکێ و هژمارا قوتابیێن هاتینە وەرگرتن و پلانێن پاشەرۆژی یێن پێشڤەبرنێ کر و گۆت: "مە ئەڤ سالە ٤٦ قوتابی وەرگرتینە و کارێ مە یێ سەرەکی دێ ڤەکۆلین و هەلکۆلان بیت لدۆر شینواران و بابەتێن دهێنە خواندن تیۆری و پراکتیکینە و ئەم دێ هەمی شیانان دەینە کاری کو ئەڤ پشکە د پاشەرۆژێ دا ببیتە کولیژ".

    د پەنەلی دا، سێ بسپۆرێن شینوارناسیێ ئامادەبوون، کو دوو ژ وان ژ زانکۆیێن ئەلمانی بوون، ئەوژی د. پیتەر فلزنەر و د. ئیڤانا پۆلس ژ زانکۆیێن توبینگن و فرایبۆرگ،  هەروەسا د. حەسەن ئەحمەد قاسم ژ پشکا شینواران ل زانکۆیا دهۆک. د پەنەلی دا کەتوارێ شینوارناسیێ ل پارێزگەها دهۆکێ و چەوانیا پێشڤەبرنا ڤی کەرتی و هەلکۆلان و سەخبێریکرنێن پێشین یێن شینواران هاتنە باسکرن. پاشی ئامادەبووی ژی ب پرسیار و تێبینیێن خۆ پشکداربوون.