راگەهاندنا زانکۆیا دهۆک؛ ٢٢ـی چریا ئێکێ٢٠٢٢
ب مەرەما بەخشینا پشتبەستنێ، تیما نیشتیمانیا پشتبەستنێ ل عیراقێ سەرەدانا خۆ بۆ کولیژا پزیشکی یا زانکۆیا دهۆکێ ب کۆمەکا چالاکیا ب دویماهی ئینا.
رۆژا ئێکشەمبی ڕێکەڤتی ١٦/١٠/٢٠٢٢، تیما نیشتیمانی یا پشتبەستنێ ل کولیژێن پزیشکی ل عیراقێ، بۆ هەلسەنگاندن و بەخشینا پشتبەستنێ ب کولیژا پزیشکی یا زانکۆیا دهۆکێ دەست ب سەرەدانا خۆ یا مەیدانی کر بۆ کولیژا پزیشکی، کو سەرەدانا وان بۆ ماوێ پێنج رۆژان یا بەردەوام بوو، د ڤێ ماوەی دا تیما نیشتیمانی سەرەدانا هەمی پشک و نەخۆشخانەیێن سەر ب کولیژا پزیشکی ڤە کر.
دەربارەی ڤێ چەندێ ژی، د. دلدار حاجی راگرێ کولیژا پزیشکی ل زانکۆیا دهۆک گۆت: "ل دەستپێکێ سوپاسیا د. داود سلێمان ئەتروشی سەرۆکێ زانکۆیێ دکەین بۆ هاریکاری و پشتەڤانیا وی یا بەردەوام بۆ کولیژا پزیشکی، ب تایبەتی ل دەمێ سەرەدانا تیما ئەنجومەنێ نیشتیمانی، هەروەسا سوپاسیا رێڤەبەرێ گشتیێ ساخلەمیا دهۆکێ د. ئەفراسیاب موسا دکەین بۆ هاریکاریا وان، ماوەکێ درێژە کولیژا پزیشکی بەرهەڤیان بۆ بدەستڤەئینانا پشتبەستنا ئەنجومەنێ نیشتیمانی بۆ کولیژێن پزیشکی ل عیراقێ دکەت.
راگرێ کولیژا پزیشکی گۆت ژی "بدستەڤەئینا پشتبەستنێ ژلایێ ئەنجومەنێ نیشتیمانی ڤە مەزنترین دەسکەڤتە بۆ هەرێما کوردستانێ ب گشتی و زانکۆیا دهۆکێ ب تایبەتی، ژبەرکو تا نوکە بتنێ ئێک کولیژ ل سەر ئاستێ عیراقێ ئەڤ پشتبەستنە بدەستخۆڤە ئینایە".
ژلایەکێ دی ڤە راگرێ کولیژا پزیشکی دیارکر "رۆژێن دەستپێکێ تیما ئەنجومەنێ نیشتیمانی هویربینیا دیکیۆمێنتێن ژ لایێ کولیژێ ڤە هاتینە ئامادەکرن دکر کو زێدەتر ژ ٩ هزار لاپەڕان پێکدهێن، ل رۆژێن ل دویڤ دا ئەنجومەنێ نیشتیمانی سەرەدانەکا مەیدانی د ناڤ ئاڤاهیێ کولیژێ دا ئەنجامدا و د ڤێ سەرەدانا خۆ دا ب تێروتەسەلی گەنگەشە دگەل سەرۆک پشک و مامۆستا و قوتابی و فەرمانبەرێن پشک و لابۆران کرن".
هەروەسا ل رۆژێن دویماهیێ ژێ تیما شاندێ ئەنجومەنێ پشتبەستنا کولیژێن پزیشکی ب هەڤالبەندیا شاندێ کولیژا پزیشکی سەرەدانا نەخۆشخانا ئازادی یا فێرکرنێ کر، ب گەرمی ژلایێ د. سگڤان سلێمان دۆسکێ رێڤەبەرێ نەخۆشخانا ئازادی ڤە، هاتە پێشوازیکرن.
ل دویماهیێ ژی راگرێ کولیژا پزیشکی ڕاگەهاند " ل دویڤ ئامادەکاریێن مە کرین، ئەنجامێن سەرەدانا تیما نیشتمانێ دێ گەلەک باش بن و دێ د بەرژەوەندیا کولیژا پزیشکی یا زانکۆیا دهۆکێ دا بن بۆ بدەستڤەئینا پشتبەستنێ".
هەژی ئاماژێ یە، پشتی ب دویماهی هاتنا سەرەدانا شاندێ ئەنجومەنێ نیشتیمانیێ پشتبەستنێ ب کولیژێن پزیشیکی ل عیراقێ، دێ ئەنجامێ سەرادانا خۆ بۆ کولیژا پزیشکی ل زانکۆیا دهۆک ئاشکرا کەن.