"گرنگی و كارتێكرنا زمانێ‌ دایكێ‌ د پرۆسێسا پەروەردێ دا" ناڤونیشانێ دیدارا کولیژا پەروەردا بنیاتا ئامێدیێ ل زانکۆیا دهۆک بوو
Feb. 21, 2022, 10:52 p.m.

ب هەلکەڤتا رۆژا جیهانیا زمانێ دایکێ، کولیژا پەروەردا بنیاتا ئامێدیێ یا زنکۆیا دهۆک دیدارەکا زانستی لدۆر گرنگی و کارتێکرنا زمانێ دایکێ د پرۆسێسا پەروەردە فێرکرنێ دا ئەنجامدا، کو بابەتێن گرێدای وەرارا زمانێ دایکێ و چەوانیا پاراستنێ و مەترسیێن ژناڤچوونێ و هەروەسا رۆل و ئاریشەیێن زمانێ دایکێ د پەروەردێ دا هاتنە گەنگەشەکرن. د ڤێ دیدارا زانستی دا ئەواد. ئەحمەد محەمەد سالح وەکو نوینەرێ سەرۆکاتیا زانکۆیا دهۆک تێدا بەرهەڤبووی، عەمەر ئۆرەیی بەرپرسێ لقا ١٨ یا پارتی دیموکراتی کوردستان، کەسایەتیێ بەرنیاسێ ڤێ دەڤەرێ محەمەد محسن ئامێدی، وارشین سەلمان قایمقامێ ئامێدیێ و هژمارەکا کەسایەتی و قوتابی و مامۆستایان ئامادەبوون.


د ڤێ دیدارێ دا، د. ئەحمەد محەمەد سالح، هاریکارێ سەرۆکێ زانکۆیا دهۆک، پەیڤا سەرۆکاتیا زانکۆیا دهۆک پێشکێشکر و تێدا ئاماژە دا هەوێن سەرنەگرتیێن دژی زمانێ کوردی دا و گۆت: " زمانێ کوردی، وەکو نەتەوا کورد، بەردەوام تووشی هەولێن چەوساندن و حەلاندنێ بوویە، لێ د هەر سەردەمەکی هندەک بلیمەت و خەباتکەر دیار بووینە کو ئەو هەولە سەرنەگرن. د ڤی سەردەمی دا، کەدا پێشمەرگا و خوینا شەهیدان و خامەیێ رۆناکبیر و مامۆستا و ڤەکۆلەران هند هێز و زانین بۆ مە چێکریە کو ئەم بەرەڤانیێ ژ خاکا خۆ و کەلتۆر و زمان خۆ یێ دایکێ بکەین".


هەر د پەیڤا خۆ دا، هاریکارێ سەرۆکێ زانکۆیا دهۆک لدۆر گرنگیا بسپۆریا زمانێ کوردی دیارکر کو: " دبیت مە شیان هەبن د هژمارەکا زۆرا بوارێن زانستی دا پشتبەستنێ لسەر زانینا جیهانی بکەین و بچینە دناڤ جیهانگیریێ دا، لێ د بوارێ زمانێ دایکێ دا، مە چ پێگوهۆر نینن! نە بتنێ ئەڤە، بەلکو پێدڤیە ئەم وەکو زانکۆیا دهۆک بسپۆرێن زمان و کەلتۆرێ کوردی بۆ سەنتەرێن جودایێن جیهانییێن ئەکادیمی بهنێرین".


پاشی و د روینشتنەکێ دا، کو برێڤەبرنا د. نعمەتوللا حامد نهێلی، سەرۆکێ پشکا کۆمەلناسی ل کولیژا پەروەردا بنیاتا ئامێدیێ هاتیە برێڤەبرن، دیدارەک هاتە بەستن و د. عەبدوللا عەزیز بابان، مامۆستا پەیمان مووسا و د. ئارا عەلی ئامادەبووین، باس ل کۆمەکا بابەتێن گرێدای پرسگرێکێن گرێدای زمانێ دایکێ و پرۆسێسا پەروەردەکرنێ هاتە کرن.

د. کەرڤان ئامێدی راگرێ کولیژا پەروەردا بنیاتا ئامێدیێ پەیڤەک خواند و تێدا باس ل گرنگیا زمانێ دایکێ کر، نەخاسمە زمان وەکو ناسنامەیا مللەتی، ب تایبەت د ئەڤێ دەڤەرێ دا و ل ئەڤی سەردەمێ جیھانگیریێ و تەکنەلوژیایێ. د پەیڤا خۆ دا ناڤبری دیارکر کو: "پێدڤیە مە سیاسەتەکا روھن ھەبیت بۆ پشتەڤانیکرنێ ل زمانێ کوردی و ئەم ھەڤکاریێ دخوازین دناڤبەرا کەرتێ پەروەردێ و یێ خواندنا بلند دا، چونکو ئەڤ هەردوو کەرتە دشێن ئەڤێ رەوشا ھەیی بگوھۆرن، ئەوژی ب پلان و کارکرنەکا ساخلەم، کو دێ شێن ئایندەکێ گەش بو زمانێ کوردی ئافرینین".


د. عەبدوللا بابان لدۆر ئاستەنگێن پرۆسێسا فێرکرنێ ھەر ژ باخچێن زارۆکان تاکو خواندنا زانکۆیێ باسکرن. دیسان ئاماژە دا بابەتێ فرەدیالیکتیا زمانێ کوردی و ئەو ئاستەنگێن دکەڤنە د پرۆگرامێن خواندنێ دا بۆ قوتابیان.


ژ لایێ خۆ ڤە، مامۆستا پەیمان مووسا لدۆر قۆناغێن دروستبوون و وەرارا زمانێ دایکێ ئاخڤت و کورتیەکا مێژوویی لدۆر ئەڤێ ھەلکەڤتێ پێشکێشکر و گرنگیا پویتەدانێ ب فێربوونا ب رێکا زمانێ دایکێ و جوداھی و ئاستەنگێن وەرگرتنێ ب رێکا زمانەکێ بیانی شرۆڤەکرن. ھەروەسا بابەتێ بەربەلاڤبوونا قوتابخانێن بیانی ل کوردستانێ و ئەو ئاریشەیێن ئەڤ جۆرێ قوتابخانەیان بۆ زارۆکان د پاشەرۆژێ دا پەیدادکەن دانە دیارکرن. هەروەسا د. ئارا عەلی باس ل رۆلێ زمانێ دایکێ د پرۆسێسا پەروەردە و فێرکرنێ دا کر.