یاداشتنامەکا لێکتێگەهشتنێ د ناڤبەرا زانکۆیێن دهۆک و سەلاحەدین و سۆران دا هاتە ئیمزاکرن
Sept. 13, 2022, 12:32 a.m.

ئەڤڕۆ رێکەڤتی ١٢ـی ئەیلوولا ٢٠٢٢ـێ، ل دیوانا سەرۆکاتیا زانکۆیا سەلاحەدین هەولێر، د. کامەران یونس محمد ئەمین، سەرۆکێ زانکۆیا سەلاحەدین هەولێر، ب مەرەما ئیمزاکرنا لێکتێگەهشتنێ د ناڤبەرا هەرسێ زانکۆیێن (سەلاحەدین_هەولێر، دهۆک و سۆران) دا، پێشوازی ل د. داود سلێمان ئەتروشی سەرۆکێ زانکۆیا دهۆک، و د. شێروان شەریف قرطاس سەرۆکێ زانکۆیا سۆران و د. ئەمیر شعبان چالی نوینەرێ وەزیرێ خواندنا بلند کر.

هەژی گۆتنێ یە دڤێ کۆمبوونێ دا هاریکارێن سەرۆکێ زانکۆیێن دهۆک و سۆران بۆ کاروبارێن زانستی و خواندنا بلند ژی ئامادەبوون.

د دەسپێکا کۆمبوونێ دا سەرۆکێ زانکۆیا سەلاحەدین_هەولێر د پەیڤەکێ دا خۆشحالیا خۆ ب ئیمزاکرنا ئەڤێ لێکتێگەهشتنێ ل زانکۆیا سەلاحەدین ل هەولێرا پایتەختێ هەرێما کوردستانێ د ناڤبەرا هەرسێ زانکۆیان دا دەربری ب مەبەستا ئەنجامدانا کارێن هەڤپشکێن ئەکادیمی و زانستی، ب مەبەستا زێدەتر خزمەتکرنا کوردستانێ و گرنگیدانا زێدتر ب مێژوویا پڕ سەروەریا گەلێ کورد.

هەروەسا راوێژکارێ وەزیرێ خواندنا بلند و ڤەکۆلینێن زانستی، د. ئەمیر شعبان چالی، د ڤێ رێورەسمێ دا راگەهاند "خۆشحالم ئەڤڕۆ د رێورەسمەکێ هەژی و ئەکادیمی دا پشکدارم، ب مەبەستا ئیمزاکرنا ئەڤێ لێکتێگەهشتنێ د ناڤبەرا هەرسێ زانکۆیێن مەزێنێن کوردستانێ دا، ب مەبەستا ئەجامدانا کارێن هەڤپشک".

هەر د درێژیا کۆمبوونێ دا، د. داود سلێمان ئەتروشی سەرۆکێ زانکۆیا دهۆک، پەیڤەک پێشکێشکر و گۆت"خۆشحالم ئەڤڕۆ ل هەولێرا پایتەختم، بۆ ئیمزاکرنا رێکەڤتننامەیا لێکتێگەهشتنێ بۆ ئەنجامدانا کارێن هەڤپشک، د راستیێ دا مە وەکو زانکۆیا دهۆک پەیوەندیێن باش و بەردەوام د گەل هەردوو زانکۆیێن سۆران و سەلاحەدین هەنە، بەلێ زۆر خۆشحالم کو د ڤێ یاداشتنامێ دا کارێن مە یێن هەڤپشک دێ چنە د چارچۆڤێ سیستەمی دا، بۆ زێدەتر خزمەتکرنا خواندنا بلند ل کوردستانێ".

ژلایەکێ دی ڤە د. شێروان شەریف قرطاس سەرۆکێ زانکۆیا سۆران، ئاماژە ب وێ چەندێ کر ئەم وەکو زانکۆیا سۆران کارکرنا هەڤپشک دگەل هەردوو زانکۆیێن دهۆک و زانکۆیا سەلاحەدین جهێ شانازیێ یە، و دێ هەمی هەولا دەین بۆ پتر پێشئێخستنا ئەکادیمی و زانستی و هزری ل کوردستانێ".