زانکۆیا دهۆک و زانکۆیا زاخۆ یاداشتنامەکا لێکتێگەهشتنێ ئیمزاکر
Oct. 12, 2022, 8:23 p.m.

راگەهاندنا زانکۆیێ؛ ١٢ـی چریا ئێکێ، ٢٠٢٢

یاداشتنامەکا لێکتێگەهشتنێ یا (٧) خالی، ب مەرەما خورتکرنا پەیوەندیان و پتر پێشڤەبڕنا ئاستێ زانستی و مفاوەرگرتن ژ مامۆستایێن وانەبێژ د ناڤبەرا زانکۆیا دهۆک و زانکۆیا زاخۆ دا هاتە ئیمزاکرن.

ئەڤڕۆ رۆژا چواڕشەمبی، ڕێکەڤتی ١٢/ ١٠/ ٢٠٢٢ و د رێورەسمەکی دا ل سەرۆکاتیا زانکۆیا دهۆک، و ب ئامادەبوونا د. داود سلێمان ئەتروشی سەرۆکێ زانکۆیا دهۆک و د. ناظم سلێمان عبدلعزیز سەرۆکێ زانکۆیا زاخۆ، هەروەسا ب بەرهەڤیا هاریکارێن هەردوو سەرۆک زانکۆیان د. ئەحمەد محەمەد سالح و د. کاروان فەهمی سامی و د. رەند حەمۆدی رێڤەبەرا ئۆفیسا پەیوەندیێن نیڤدەلەتی ل زانکۆیا دهۆک و د. دیلان روستەم شیرەتکارێ سەرۆکێ زانکۆیا دهۆک، یاداشتنامەکا لێکتێگەهشتنێ د ناڤبەرا هەردوو زانکۆیان دا هاتە ئیمزاکرن.

ل دەستپێکا رێورەسمێن ئیمزاکرنێ، سەرۆکێ زانکۆیا دهۆک خۆشحالیا خۆ ب ئەنجامدانا ئەڤێ یاداشتناما لێکتێگەهشتنێ دیارکر، هیڤی خواست زانکۆیێن دهۆک و زاخۆ ل سەر ئەنجامدانا کارێن هەڤپشک بەردەوامبن.

پاشی سەرۆکێ زانکۆیا زاخۆ، د. ناظم سلێمان، کەیفخۆشیا خۆ ب ئیمزاکرنا ئەڤێ لێکتێگەهشتنێ دگەل زانکۆیا دهۆک دیارکر و گۆت "ئەم گەلەک پێدڤی ب ئەنجامدانا کارێن هەڤپشکین ب تایبەتی دگەل زانکۆیا دایک (زانکۆیا دهۆک) بۆ پێشڤەبرنا ئاستێ زانستی و ئەنجامدانا کۆنفرانس و چالاکیێن ئەکادیمی دگەل زانکۆیا دهۆک و زانکۆیێن دیێن هەرێما کوردستانێ".