ب مەبەستا مفاوەرگرتنێ ژ بەرهەم و پرۆژێن دەرچوویێن کولیژا پلاندانانا جهەکی ل زانکۆیا دهۆک بۆ پێشڤەبرنا ئاڤەدانکرنێ و باژێرێن هەرێما کوردستانێ، ئەڤرۆ رێکەڤتی ٧ـی ئادارا ٢٠٢٣ و ل هۆلا ناڤەندا قوتابیان، کولیژا پلاندانانا جهەکی ل زانکۆیا دهۆک چالاکیەک ئەنجامدا. د ڤێ چالاکیێ دا سەرۆکێ زانکۆیا دهۆک و نوینەرێ پارێزگەها دهۆکێ و ئەندامێن جڤاتا زانکۆیا دهۆک و مامۆستا و قوتابی و دەرچوویێن کولیژا ناڤبری ئامادەبوون.
راگرا کولیژا پلاندانانا جهەکی ل زانکۆیا دهۆک، د. لەیلا محەمەد رەسوول د پەیڤا دەستپێکرنێ دا باس ل تایبەتمەندیا ڤێ کولیژێ کر و خویاکر "بسپۆریا ڤێ کولیژێ گرنگیەکا مەزن هەیە بۆ پێشڤەبرنا باژێران، قوتابی و مامۆستا ژی د پرۆسێسێن ئەکادیمیێن گەلەک باش را دەرباسدبن و سەرەدانا بۆ وەلاتێ ئەلمانیا دکەن و خول و کۆرسێن ئاڤاکرن و پێشڤەبرنا شیانێن ئاڤاکرنا باژێران وەردگرن"، پاشی سوپاسیا سەرۆکاتیا زانکۆیا دهۆک کر بۆ گرنگیدانا بەردەوام و پیرۆزباهی ل دەرچوویان کر.
ژ لایێ خۆ ڤە، د. داود سلێمان ئەترووشی، سەرۆکێ زانکۆیا دهۆک دەستخۆشی ل راگر و مامۆستا و قوتابیێن ڤێ کولیژێ کر و باس ل گرنگیا گرێدانا پرۆژێن دەرچوویا ب پێشڤەبرنا باژێران ڤە کر و دیارکر "کولیژا پلاندانا جهەکی یا تایبەت و فرەبوارە و دەرچوویێ وێ دیتنەکا فراوان بۆ پرۆژە و بریارێن پێشڤەبرنا باژێران هەیە، لەورا داخوازێ ژ حکومەتا هەرێمێ دکەین ب دروستی مفای ژ ڤان دەرچوویان وەربگریت، ژبەرکو دەرچوویێن ڤێ کولیژێ چەکدارن ب زانین و کارامەییێ د ڤێ بسۆریێ دا".
هەر د ڤێ چالاکیێ دا، هەردوو دەرچوویێن ڤێ کولیژێ، ئەلند کەمال و شاناز سەربەست، بابەتەک ب ناڤونیشانێ "پێداچوونەک ل سەر بیاڤێن پرۆژەیێن هەڤپشکێن کولیژێ" هاتە پێشکێشکرن. پاشی د. بەشیر سەعید، سەرۆکێ پشکا پلاندانانا جهەکی بابەتەک ل دۆر "رەوشا هاتنوچوونا ئاوارەیان، دەربەدەر و جڤاکێ مێڤاندار – دۆخێ ناوچەیا دۆمیز" پێشکێشکر. ل دویڤ دا، هەر ئێک ژ ئیمان پیرمووس و ڤەمان فەهمی، دەرچوویێن ڤێ کولیژێ، بابەتەک ب ناڤونیشانێ "هەلسەنگاندنا دۆمدرێژیا جڤاکی ل سەر ئاستێ تاخێن باژێری – دۆخێ باژێرێ دهۆکێ" پێشکێشکر.
ل دویماهیێ ژی، چیرۆکێن سەرکەڤتنێ یێن هژمارەکا دەرچوویێن ڤێ کولیژێ ب رێکا کورتە ڤیدیۆیەکێ هاتنە نمایشکرن و پاشی تۆرا دەرچوویێن ڤێ کولیژێ هاتە راگەهاندن و باوەرنامێن هەڤپشک ل سەر دەرچوویێن هەردوو سالێن بۆری یێن خواندنێ هاتنە بەلاڤکرن.
دهێتە زانین كولیژا پلاندانانا جهەکی ل زانکۆیا دهۆک ل ١ـی نیسانا ٢٠٠٧ـێ هاتیە دامەزراندن، ئەڤ کولیژە ژ دوو پشکا پێکدهێت، ئەوژی زانستێن عەردی کارەکی و پلاندانانا جهەکی و هەتا نوكە ٤١٨ قوتابی ژێ دەرچووینە و ١٦٣ قوتابی ژی ل قۆناغێن جودا یێن خواندنێنە ل ڤێ كولیژێ. ژ سالا ٢٠١٢ـێ تا نوکە، ئەڤ کولیژە باوەرنامێن هەڤپشک پێشکێشی دەرچوویا دکەت، ئەڤ باوەرنامە ژی د چارچۆڤێ بەرنامەکی دانە، ب هەڤکاری دگەل زانکۆیا تەکنیکیا دۆرتمۆند و پشتەڤانیا رێکخراوا DAAD یا ئەلمانی دهێتە ئەنجامدان.
راگەهاندنا زانکۆیا دهۆک؛ ٧ـی ئادارا ٢٠٢٣
عسمەت خابوور
فۆتۆ: محەمەد عەبدولکەریم و هەرمان جانگیر