ب بەرهەفبوونا سەرۆكێ زانكۆیا دهۆك پ.د. مسلح محەمەد سەعید و بالیۆزێ ئەلمانیا ل عیراقێ جوزیف كریمپ و جێگرا سەرۆكێ نەتەوەیێن ئێكگرتی خاتون باگورا و پارێزگەرێ دهۆكێ فەرهاد ئەتروشی و وەزیرا زانستی یا ویلایەتا بادنڤورتنبیرك خاتون باوەر نوونەرێ زانكۆیا تویبنگن پ. مارتن هاودسنگر و راگرێ پەیمانگەها جارەسەریا دەرونی و جارەسەریا تراومایێ د. ئیلهان قزلهان و جێگرێ راگرێ پەیمانگەهێ د. ممو عوسمان و چەندین مامۆستا و قوتابیێن زانكۆیا دهۆك رێ و رەسمێن ڤەكرنا پەیمانگەها جارەسەریا دەرونی و جارەسەریا تراوما ل زانكۆیا دهۆك پرێڤە چوو.
سەرۆكێ زانكۆیا دهۆك پ.د. مسلح محەمەد سەعید گۆت: پەیمانگەها جارەسەریا دەرونی و جارەسەریا تراومایێ ب هەڤكاریا زانكۆیا تویبنگن یا ئەلمانیا ل زانكۆیا دهۆك هاتە ڤەكرن، كۆ ئەڤە دەستكەفتەكا دیترە بۆ زانكۆیا دهۆك و پتر خوشكرنا پەیوەندیانە دناڤبەرا زانكۆیا دهۆك و زانكۆیێن جیهانی یێن زانستی و ئەكادیمی دایە.
پ.د. مسلح محەمەد سەعید گۆت ژی: مللەتێ مە تووشی گەلەك نەخوش و دەردەسەریان بوویە و ژ ئەنجامێن نەخوشیێن سیاسی كارتێكرنێن مەزن لسەر دەرونێ خەلكێ مە بوویە و ب تایبەت پشتی هاتنا تیرۆرستێن داعشێ، راستە ژلایێ ئێمناهی ڤە هاتینە پاراستن لێ ژلایێ دەرونی ڤە خەموكی بووینە و هێشتا پێدڤی جارەسەركرنێ نە، لەوا زانكۆیا دهۆك بفەر زانی ڤێ پەیمانگەهێ ڤەكەت دا كۆ مامۆستا و دەرچوویێن ڤی پەیمانگەهێ خزمەتا خەلكێ خو بكەن.
دێ ئەڤ پەیمانگەهە كادرێن شارازا دبوراێ دەرونی و تراومایێ دا دروست كەت وەك سەرۆكێ زانكۆیا دهۆك گۆتی: هەر وەسا دێ پتر خزمەتا جڤاك و مللەتێ خۆ كەن.
راگرێ پەیمانگەها جارەسەریا دەرونی و جارەسەریا تراومایێ د. ئیلهان قزلهان گۆت: تا نوكە ل هەرێما كوردستانێ ژمارا نوژدارێن دەرونێ گەلەكا كێمە، كۆ پێدڤییەكا گەلەك ب نوژدارێن دەرونی هەیە داكۆ ئەڤ نەخوشیییە بهێنە جارەسەركرن.
زانستێ دەرونی گەلەك گرنگیا خو هەیە وەكی د. ئیلهان قزلهان گۆتی: تا جارەسەریا دەرونی بۆ نەخوشێن وی نەئێتە كرن مەترسی لسەر ژیانا وان هەیە و نەشێن ژیانا خو ب ئارامی بەنە سەر و بۆ ڤێ چەندێ ژی دڤێت كەسێن پسبور هەبن، لەوا ب هاریكاریا وەلاتێ ئەلمانیا ل باژێرێ دهۆكێ ئەڤ پەیمانگەهە هاتە ڤەكرن داكۆ چەندین قوتابیان و پشتی سێ سالان دئێنە پەروەردە كرن بكەفنە كاری ل وەلاتێ خو و خزمەتا كەسێن نەخوش ب ئێشا دەرونی بكەن ژبۆ جارەسەركرنا وان.
راگەهاندنا زانكۆیا دهۆك: هەلز عەلی سەلیم