قوتابیێن پشکدارێن دانوستاندنەکا ناڤدەولەتی هاتنە رێزلێنان
Jan. 14, 2023, 8:47 p.m.

راگەهاندنا زانکۆیا دهۆک؛ ١٤ـی کانوینا دووێ ٢٠٢٣

ژبەر رۆل و ئاستێ بلندێ قوتابیێن زانکۆیا دهۆک د دانوستاندنەکا ناڤدەولەتی دا، سەرۆکاتیا زانکۆیا دهۆک باوەرنامێن رێزلێنانێ پێشکێشی وان قوتابیان کرن.

ب ئامادەبوونا د. نەبەز ئیبراهیم محەمەد، هاریکارێ سەرۆکێ زانکۆیێ بۆ کاروبارێن قوتابیان، ل ١١ـی کانوینا دووێ ٢٠٢٣ و ل هۆلا جڤاتا زانکۆیا دهۆک، باوەرنامێن رێزلێنانێ پێشکێشی قوتابیێن پشکدارێن دانوستاندنا ناڤدەولەتیا د ناڤبەرا قوتابیێن زانکۆیا دهۆک و زانکۆیا پەنسلڤانیا یا ئەمرکی دا کرن، کو ئەڤ دانوستاندنە ب مەرەما بەرفرەهکرنا لێکتێگەهشتنێ د ناڤبەرا قوتابیێن جیهانێ دا، ب چاڤدێریا سەنتەرێ World in Conversation ل زانکۆیا پەنسلڤانیا یا ئەمریکی دهێنە ئەنجامدان.

هاریکارێ سەرۆکێ زانکۆیێ بۆ کاروبارێن قوتابیان ل دۆر ڤێ یەکێ راگەهاند "پشکداربوونا قوتابیێن زانکۆیا دهۆک ب ئاستەکێ بلند د ڤان دانوستاندنێن ناڤدەولەتی دا جهێ شانازیێ یە بۆ زانکۆیا دهۆک، و پشتەڤانیا خۆ ژی بۆ قوتابیێن پشکدار د ڤێ دانوستاندنێ دا دیاردکەین و سوپاسیا مامۆستا و ستافێ زانکۆیا دهۆک دکەین بۆ پشتەڤانی و هاریکاریا وان بۆ قوتابیێن پشکدار".

ژ لایێ خۆ ڤە، د. سەعید ئدریس سەعید، بەرپرسێ گرۆپێ قوتابیێن زانکۆیا دهۆک، ب تێروتەسەلی باس ل ناڤەرۆکا ئەڤێ دانوستاندنێ کر و گۆت "مەرەم ژ ئەڤان دانوستاندنان بەرفرهکرنا لێکتێگەهشتنا قوتابیێن هەمەجورە ژ وەلاتێن جودا، ئەوێن خودان رەوشەنبیری و پاشخانێن جودا، هەروەسا کۆمکرنا قوتابیان ژ زانکۆیێن جودا، ئارمانجەکا سەرەکیا ئەڤێ دانوستاندنێ یە، کو ب رێکا ئۆنلاین دانوستاندن د ناڤبەرا قوتابیان دا دهێنە ئەنجامدان، کو ماوێ هەر دانوستاندنەکێ ٩٠ خولەکن، ئەڤ دانوستاندنە ب رێکا بەرپرسێ گرۆپی دهێنە رێکخستن".

هەژی ئاماژێ یە، هەتا نوکە سێ گەڕێن دانوستاندنا ژ لایێ قوتابیێن زانکۆیا دهۆک ڤە هاتینە ئەنجامدان، ب پشکداریا سێ گرۆپێن قوتابیان، کو هەر گرۆپەک ژ ٤ قوتابیان پێکدهات، ئەڤ قوتابیە ژ کولیژێن جودایێن زانکۆیا دهۆکن. ژ بەر گرنگیا ئەڤان دانوستاندنا و ئاست بلندیا قوتابیێن زانکۆیا دهۆک، زانکۆیا پەنسلڤانیا بریار دا ئەڤ دانوستاندنا د گەل زانکۆیا دهۆک بەردەوامبن، نوکە ژی قۆناغا نوی یا دانوستاندنا د ناڤبەرا قوتابیێن زانکۆیا دهۆک و زانکۆیا پەنسلڤانیا یا ئەمریکی دا دەستپێکریە.