ب ئامادەبونا سەرۆکێ زانکۆیا دهۆک و مامۆستا و قوتابی و هژمارەکا تایبەتمەندان، کۆربەندەکێ زانستی ب ناڤونیشانێ "سۆریا بەرەڤ کیڤە؟" ل ناڤەندا قوتابیان یا زانکۆیا دهۆک ژ لایێ کولیژا زانستێن سیاسی و کولیژا زانستێن مرۆڤایەتی ڤە ب هەڤکاری دگەل سەنتەرێ بێشکچی و سەنتەرێ ئەوروپی بۆ ڤەکۆلینێن کوردی ل بەرلین هاتە سازکرن.

پ.د. ئێڤا ماریا بێلزەر Prof. Dr. Eva Maria Belser ژ زانکۆیا فرەیبۆرگ یا سوێسری لدۆر دەستوورەکێ پێشبینیکری بۆ سۆریا فیدرال ئاخڤت و زانستێ دەستووری و چەوانیا نڤیسینا دەستوور و یاسا و رێسایێن دەستوور و برگە و یاسایێن بخۆڤەدگریت، و کا چەند جۆرێن دەستووران هەنە. سەبارەت سۆریایێ جوداهیا خۆ ژ عیراقێ هەیە، پێدڤیە دەستوورێ وان جوداتر بیت، و نەبوونا دەستووری ل هەر وەلاتەکی یان هەرێمەکێ دبیتە ئەگەرێ بەڕەلاییا دەستووری و زێدەبوونا رێژا گەندەلیێ و ناکۆکیێن سیاسی و بجهنەئینانا یاسایێ و ڤالاهیا دیپلۆماسی و نەسەقامگیری و نەرێزگرتن ل کێمەنەتەوە و خودان هزر و دیدێن جودا.

ژ لایەکێ دی ڤە، لدۆر وێ پرسێ کا چەوا دەستووری سۆریێ گەهشتە رەوشا نها؟ د. زۆرن کایلDR. Soeren Keil ، دیپلۆمات و راوێژکارێ UN ێ دیارکر کو پرەنسیپێن دەولی زۆر ئالۆزن تا بریارا دروستبوونا دەولەتەکا نوو ل دونیایێ دروستببیت، لێ ئەڤە مافێ کوردانە چونکە مەزنترین نەتەوەیە مایە بێ وەلات د ناڤبەرا سێ وەلاتێن نەتەوەپەرست دا و شیاینە زمان و کولتور و رەوشەنبیریا خۆ بپارێزن.

د. ئێڤا جارەک دی ڤەگەریا ئاخڤتنا د. زۆرن کایل و بەرسڤا وی ب گرنژین ڤە دا گۆت: مانا د ناڤ چارچۆڤێ چوار وەلاتان دا نەباشترە، بەلکو باشترین بژداردەیە بۆ کوردا تا چەندین سالێن دی دەرفەتا دروستکرنا دەولەتەکێ بۆ درەخسیت، هەروەسا دیارکر کو یاسا تشتەکە و دەستوور تشتەک دییە، یاسا هندەک بریارن نابیت کەس ژێ دەربازببیت، لێ دەستوور ئانکو رێکخستنا دەولەتەکێ، کوکەتەلۆکا رێڤەبرنێ یە، دانانا حوکمرانیێ یە، دانانا میزانیا دەولەتێ یە، ئارمانج و بنەمایێن وێ دەولەتێنە، ب کورتی، سەنگ و هەڤکێشا وێ دەولەتێ یان حکوومەتێ یە. دیسان ناڤبری دیارکر کو هەبوونا دەستووری ئانکو هەبوونا یەکسانیێ د هەر تشتەکی دا، وەکو خزمەتگوزاری، ئێمناهیەکا باش و رازیبوونا خەلکی.

ل دویماهیا ڤی کۆربەندی، قوتابی و بسپۆرێن ئامادەبووی د ڤێ دانوستاندنێ دا پشکداربوون و پرس و بۆچوون و پێشنیازێن جودا هاتنە گەنگەشەکرن.