ئەڤرۆ رێکەڤتی ٢٠ـی شوباتا ٢٠٢٣، کولیژا پزیشکیا ڤێتێرنەری ل زانکۆیا دهۆک ب هەڤکاری دگەل رێکخراوا جیهانی یا پزیشکێن ڤێتێرنەری IVSA، و ب ئامادەبوونا د. نەبەز ئیبراهیم محەمەد، هاریکارێ سەرۆکێ زانکۆیا دهۆک بۆ کاروبارێن قوتابیان، و د. محەمەد شوکری، راگرێ کولیژا پزیشکیا ڤێتێرنەری و هژمارەکا راگرێن کولیژا و مامۆستا و مێڤان و ئاژەلدۆستان و دەزگەهێن راگەهاندنێ، فەستیڤالا نیشاندانا شیانێن قوتابیان و پێشکێشکرنا رێنمایی و پێزانین و خزمەتێن ڤێتێرنەری هاتە سازکرن.
د ڤێ فەستیڤالێ دا، هژمارەکا گیانەوەرێن جودا هاتنە نیشاندان، کو زۆربەیا وان د ناڤ مالا دا دهێنە بخودانکرن و پێزانینێن سەرەکی ل دۆر چەوانیا چاڤدانێ و رێنمایێن ساخلەمیێ و خۆپاراستنێ و نەخۆشیێن ڤەگوهێز و هەڤپشک و سەرەدەریکرنا دروست ل گەل، بۆ مێڤانێن ئامادەبووی و پیتەدەر ب گیانەوەرا ژ لایێ قوتابیان ڤە هاتنە پێشکێشکرن.
هەر د ڤێ فەستیڤالێ دا، پێشانگەهەکا پەرتووکا د ڤی بواری دا، دگەل پێشانگەها دەرمان و کەلوپەلێن گرێدای ڤێ بسپۆریێ هاتە ڤەکرن و هەروەسا قوتابیێن کولیژا ڤێتێرنەری، گیانەوەرێن مێڤانێن فەستیڤالێ بێ بەرامبەر پشکنین کرن و ڤاکسین بۆ ڤان گیانەوەران هاتنە دانان. ئامادەبووی ژی ب ڤان خزمەتێن ئەڤ کولیژا زانکۆیا دهۆک پێشکێشدکەت خۆشحال بوون.
راگەهاندنا زانکۆیا دهۆک؛ ٢٠ـی شوبات ٢٠٢٣
سەباح ئەتروشی
فۆتۆ: محەمەد عەبدولکەریم