ل زانکۆیا دهۆک وۆرکشۆپەک ل دۆر نویترین پێشهاتێن پێداگۆجی هاتە ئەنجامدان
Feb. 20, 2023, 9:27 a.m.

كولیژا كارگێری و ئابووری ل زانكۆیا دھۆك ب ھەڤكاری ل گەل سازیا (مبدعون للتنمية والفنون) ل ١٣ـی شوباتا ٢٠٢٣، وۆركشۆپەك ل دۆر نویترین پێشهاتێن پێداگۆجی و رێكێن نوی یێن وانەگۆتنێ و بكارئینانا تەكنیكا Chat Gpt ئەنجامدا، د وۆركشۆپێ دا سمینار ژلایێ مامۆستایێن زانكۆیا بەغدا و زانكۆیا تەكنیكیا باكووری ل مویسل ھاتنە پێشكێشكرن، ئەوژی ب مەرەما زانینا پێشھاتێن نوی د رێكێن وانەگۆتنێ دا و تەكنینا Chat Gpt یا نوی، كو ھاریكاریا قوتابیان د ڤەكۆلینێن زانستی و كۆمكرنا پێزانینان دا دكەت، وۆركشۆپ ب ئامادەبوونا پرۆفسیور نصر الدین حاج صالح مامۆستایێ كولیژا كارگێری و ئابووری ل زانكۆیا دھۆك و مامۆستایێن زانكۆیا دھۆك و بەغدا و مویسل و تكریت و دیالا ھاتە ئەنجامدان.

دكتور نصر الدین حاج صالح ئاماژە ب ئەوێ چەندێ دا كو ئارمانج ژ رێكخستنا ئەڤی ووركشۆپی ل گەل سازیا (مبدعون للتنمية والفنون) زانینا دویماھی پێشھاتانە د رێكێن وانەگۆتنێ دا و بوارێ بیرتیژیا دەستكرد، ب تایبەتی ژی تەكنیكا Chat Gpt و چەوانیا گرێدانێ د ناڤبەرا ئەوان دا و بكارئینانا وێ وەك تەكنیكەكا نوی د پرۆسێسا فێركرنێ دا ل زانكۆیێ.

ھەروەسا د. إلهام علي العنوز مامۆستايا كولیژا ئەندازیاری ل زانكۆیا بەغدا و رێڤەبەرا سازیا (مبدعون للتنمية والفنون)، ئێكەم تەوەرێ وۆركشۆپێ پێشكێشكر و باس ل رێكێن وانەگۆتنێ و جۆرێن وێ و ئەو وەرارا د بیاڤێ رێكێن وانەگۆتنێ دا پەیدابووی ژ ئەگەرێ پێشكەڤتنا زانست و زانینێ و بكارئینانا تەكنیكێن نوی كر، ھەروەسا ئاماژە ب گرنگیا بكارئینانا تەكنۆلۆژیایێ د بدەستڤەئینانا پێزانینان دا کر و پێدڤیا بەرھەڤكرنا نفشەکێ پێگەھشتی و شارەزا د بوارێ بكارئینانا تەكنۆلۆژیا نوی دا، داكو پتر شیانێن سەرەدەریكرنێ ل گەل ئامیر و تەكنیكێن نوی ھەبن.

تەوەرێ دووێ یێ وۆركشۆپێ ب ناڤێ "چەوانیا بكارئینانا تەكنیكا Chat Gpt و چەوانیا بەرھنگاربوونا ئاستەنگان یێن ژ ئەگەرێ بكارئینانا ئەڤێ تەكنیكێ د پرۆسێسا وانەگۆتنێ دا پەیدادبن" ژ لایێ دكتور احمد نجم الشلاوی ڤە، ھاریكارێ زانستی ل زانكۆیا تەكنیكیا باكوری ل مویسل و مامۆستا ل پشكا تەكنۆلۆژیا پێزانینان ھاتە پێشكێشكرن، ناڤبری كورتیەك دەربارەی تەكنیكا Chat Gpt و رێكێن مفاوەرگرتنێ د رێكێن وانەگۆتنێ دا پێشكێشكر، ھەورەسا ئاماژە دا ئەوێ چەندێ كو بكارئینانا ئەڤێ تەكنیكێ پێدڤی ب ھوشیاریێ یە ژلایێ مامۆستایان ڤە داكو قوتابی تێكەلكرنێ د ناڤبەرا رۆلێ مامۆستای و رۆلێ تەكنیكا Chat Gptدا نەكەت، ھەروەسا پێدڤیە ھەبوونا رێژەیەكا كێم ژ بەرسڤدانێن شاش د بەرسڤێن تەكنیكا Chat Gpt لبەرچاڤ بھێتە وەرگرتن.

ئامادەبوویان پشکداری ل گەل برگەیێن وۆركشۆپێ كر ب رێكا پێشكێشكرنا پرسیاران و گەنگەشەكرنا پێزانینان، ل دویماھیێ ژی باوەرنامێن پشکداربوونێ ل سەر ئامادەبوویان ھاتنە دابەشكرن.

ھەژی ئاماژێ یە، سازیا (مبدعون للتنمية والفنون) رێكخراوەكا نەحكومیە، ئارمانجا وێ كاراكرنا لایەنێن زانستی و رەوشەنبیریا گشتینە، ئەوژی ب رێكا رێكخستنا وۆرکشۆپ و سمينار و خولێن فێركرنێ بۆ ھەمی تەخێن جڤاكی. ھەروەسا ئەڤ سازیە كار ل سەر ب ھێزكرنا ھەڤكاریێ ل گەل سازیێن دی دكەت بۆ دابینكرنا بارودۆخێن گونجای بۆ گەشەكرنا بوارێن ھونەری و داھێنانێ ل دەف تاكێن جڤاكی، ب ڤێ چەندێ ژی سازی ٥٠٪ ژ چالاكیێن خۆ بۆ لایەنێ مرۆڤایەتی یێ گرێدای ب پێشئێخستن و بەرھەڤكرنا بێ سەمیان و ئاوارەیان و خودان پێدڤیێن تایبەت دكەت، ھەروەسا ٥٠٪ ژ چالاكیێن خۆ بۆ لایەنێ زانستی و خزمەتكرنا قوتابی و مامۆستایان و پرۆسێسا فێركرنێ تەرخاندكەت، ھەروەسا دبیت د داھاتی دا ھەڤكاری د ناڤبەرا زانكۆیا دھۆك و سازیا (مبدعون للتنمية والفنون) د ئەنجامدانا چەندین چالاكیێن دی دا ھەبیت.

دهێتە زانین زانكۆیا دھۆك چەندین چالاکیێن زانستی د بوارێ رێكێن وانەگۆتنێ یێن نوی دا ب ھەڤكاری ل گەل چەندین رێكخراو و سازیان ئەنجامداینە، ئەوژی ب مەرەما بكارئینانا رێكێن وانەگۆتنێ یێن نوی و بەرزكرنا ئاستێ ستافێ زانستی ل زانكۆیا دهۆک.

راگەهاندنا زانکۆیا دهۆک؛ ١٩ـی شوبات ٢٠٢٣

فاطمە مەحموود

و: ماهر کێستەیی

فۆتۆ: محەمەد عەبدولکەریم