داكو ژنێزیك ئاگەهداری رەوشا كۆلیژا پەروەردێ ل ئاكرێ ببن ل رۆژا 10/11/2021 سەرۆكێ زانكۆیا دهۆك، د. داود سلیمان ئەتروشی ب یاوەریا هاریكارێ سەرۆكێ زانكۆیێ بۆ كاروبارێن كارگێری و دارایی د. ئەحمەد محەمەد سالح سەرەدانا ئاكرێ كرن.
دڤێ سەرەدانێ دا سەرۆكێ زانكۆیا دهۆك دگەل راگر و جڤاتا كۆلیژێ و نوینەرێن مامۆستا قۆتابیان كۆمبوو، ل دەسپێكا كۆمبوونێ راگرێ كۆلیژا پەروەردێ ل ئاكرێ، د. كەریم كەكو، بخێرهاتنا سەرۆكێ زانكۆیێ كر و گۆت "هیڤیا مە ئەوە كۆلیژا پەروەردێ ژ ڤێ هاتنێ مفادار بیت و ژ نێزیك ل دۆر رەوشا كۆلیژێ ئاگەهدار ببن"، هەروەسا راپۆرتەك ژی ل دۆر كۆلیژێ و پێدڤیێن وێ رادەستی سەرۆكێ زانكۆیێ كر.
ژلایێ خۆڤە سەرۆكێ زانكۆیا دهۆك، د. داود سلیمان ئەتروشی، نێرینا خۆ ل دۆر زانكۆیێ بگشتی و كۆلیژا پەروەردێ ل ئاكرێ ب تایبەتی شرۆڤەكر، و گۆت "مە بزاڤ یا كری پێداچوونێ دگەلەك كاران دا بكەین ژلایێ كارگێری و دارایی و زانستی ڤە" و هندەك ژ وان بریاران ل جڤاتا زانكۆیێ رازیبوون یا ل سەر هاتیە كرن و كەفتینە دبیاڤێ بجهئینانێ دا، وەكو نەهێلانا خاندنا ئێڤاران، ب وی رەنگی كو زیانێ هژمارا وەرگرتنا قوتابیان نەكەت، و بەردەوام بریارێن د بەرژەوەندا پێشخستنا زانكۆیێ دابن، دێ هێنە دان، دیسا پلانێن زانكۆیێ بۆ پێشخستنا ئاستێ خاندنێ و بلندكرنا ئاستێ دەرچوویان ل ڤێ كۆلیژێ بەرچاڤ كرن.
د. داود سلیمان ئەتروشی، ئاماژە دا وێ چەندێ ژی كو زانكۆ جهەكێ بهادارە ل ناڤا جڤاكی، لەورا پێدڤیە كارێ زانكۆیێ و بزنسێ ژێك بهێتە جودا كرن، گۆت ژی "راستە مە بریار یا دایی كو دەوام ژ دەمژمێر 08:30 سپێدێ هەتا 05:30 ئێڤاری بهێتە درێژ كرن، بەلێ رامان ئەو نینە مامۆستا ل ڤان دەمژمێران هەمیان ل زانكۆیێ بیت، ب تنێ زانكۆیێ ژ مامۆستایی دڤێت 30 دەمژمێران دەوامێ بكەت، ل دویف وی خشتێ بۆ دهێتە دیاركرن كا دەمژمێرێن دەواما وی ل كەنگی بن ل وی دەمی دەوامێ كەت"، كو كارێ مامۆستایی خۆ ل سێ خالان دا دبینیت ئەوژی، وانەگۆتن، ڤەكۆلین و كارێن كارگێری.
هەر د ڤێ كۆمبوونێ دا دگەل سەرۆك و ئەندامێن جڤاتا كۆلیژێ دانوستاندن ل دۆر ئاریشە و پێدڤیێن كۆلیژێ و مامۆستا و قوتابیان هاتنە كرن، و سەرۆكێن پشكێن زانستی هەر ئێكی ژلایێ خۆڤە پسیارێن خۆ ئاراستەی سەرۆكێ زانكۆیێ كرن، كو پتریا وان ل دۆر كێمیا میلاكێ وانەگۆتنێ بوون، و ژلایێ خۆڤە سەرۆكێ زانكۆیێ دیاركر كو كار یێ دهێتە كرن بۆ دابینكرنا مامۆستایێن بسپۆر بۆ كۆلیژێ ئەڤجا چ ب ئینانا مامۆستایان ژ كۆلیژێن دیتر یان ڤەگوهاستنا مامۆستایێن بسپۆر یێن سەر میلاكێ هەردوو پەروەردێن ئاكرێ و بەردەرەش بۆ ڤێ كۆلیژێ.
هەر ل رۆژا 10/11/2021 سەرۆكێ زانكۆیا دهۆك و شاندێ دگەل دا سەرەدانا چەند بەرپرسێن قەزا ئاكرێ كر، و سۆپاسیا وان كر ژ بۆ پشتەڤانیا وان یا بەردەوام بۆ كۆلیژا پەروەردێ ل ئاكرێ.