ل زانکۆیا دهۆک وۆرکشۆپەک ل دۆر زمانێ لەشی هاتە ئەنجامدان
March 28, 2023, 12:05 p.m.

کولیژا دەرمانسازی ل زانکۆیا دهۆک ب هەڤکاری دگەل رێکخراوا NLP یا راهێنان و راوێژکاری، وۆرکشۆپەکا دوو رۆژی ل دۆر زمانێ لەشی، ل سەنتەرێ رەوشەنبیری و جڤاکی و ب ئامادەبونا د. سوزان عومەر رەسوول، راگرا کولیژا دەرمانسازی، د. پەرجان هاشم تاها، هژمارەکا مامۆستایێن زانکۆیا دهۆک ئەنجامدا. د ڤێ وۆرکشۆپێ دا، بابەتێن جودا یێن گرێدای زمانێ لەشی و کارێزمایێ و هونەرێ ئەتیکێتێ ژلایێ د. حسێن محەمەد، بسپۆرێ گەشەپێدانا مرۆڤی و هەلگرێ باوەرناما دبلۆمێ د بوارێ زمانێ لەشی دا ل ٢٠ و ٢١ـی شواتا ٢٠٢٣ هاتنە پێشکێشکرن.

ل دەستپێکا وۆرکشۆپێ، د. حسێن محەمەد، بخێرهاتنا ئامادەبوویان کر، پاشی رۆنکرنەک ل دۆر بابەتێن هەردوو رۆژێن وۆرکشۆپێ دا و گۆت "ئارمانج ژ ئەنجامدانا ڤێ وۆرکشۆپێ ئەوە کو مامۆستایێن زانکۆیا دهۆک پێزانینان ل دۆر زمانێ لەشی وەربگرن، دهێتە زانین ژی کو رێژەکا زۆر ژ دانوستاندنێن مە نەدەڤکی نە، مامۆستا و قوتابی رۆژانە ب سەدان نیشانێن نەدەڤکی بۆ هەڤدوو فرێدکەن، لەورا گرنە مامۆستا یێ شارەزا بیت د ڤی زمانی دا، داکو کاریگەریەکا ئەرێنی د پولێ ڤە هەبیت بۆ هاندانا قوتابیان و پشتراستبوونا وان پێزانینێن دهێنە ڤەگوهاستن ژ لایێ مامۆستایی ڤە".

د رۆژا ئێکێ یا وۆرکشۆپێ دا، هژمارەکا بابەتێن گشتیێن گرێدای زمانێ لەشی هاتنە باسکرن و شرۆڤەکرن، وەکو، سالۆخەتێن سەر و چاڤان و کارتێکرنا وان ل سەر گەهاندنا پێزانینان، گرنژین، رۆلێ تۆنا دەنگی، پەیوەندیکرن ب رێکا چاڤا و گرنگیا وێ، و هەروەسا جۆرێن دەست هەژاندنێ و گرنگیا زانینا ئاماژێن دەستا. ل دویماهیێ ژی دانوستاندن ل دۆر بابەتێن ناڤبری ژ لایێ ئامادەبوویان ڤە هاتنە ئەنجامدان.

د رۆژا دووێ یا ڤێ وۆرکشۆپێ دا، هژمارەکا بابەتا هاتنە باس و شرۆڤەکرن، ژ وان ژی؛ تێگەهێ کارێزمایێ و گرنگیاهەبوونا وێ ل دەف مرۆڤی، هەروەسا هۆنەر و شەنگستێن ئەتیکێتێ. وۆرکشۆپێ ژی هژمارەکا پسیار و تێبینیا ژ لایێ ئامەدەبوویان ڤە هاتنە ئاراستەکرن و د. حسێن محەمەدی پرسیار و تێبینیێن ئامادەبوویان ب هویری و تێروتەسەلی بەرسڤدان.

ل دۆر گرنگیا ڤێ وۆرکشۆپێ، نۆژدارێ دەروونی د. پەرجان هاشم تاها باس دیارکر "بابەتێن د ڤێ وۆرکشۆپێ دا هاتینە باسکرن گەلەک گرنگە د ژیانا رۆژانەیا هەر تاکەکی دا بهێنە بجهئینان، ئەڤ بابەتە گەلەک گرنگن و پێدڤی ژ لایێ ناڤەندێن زانستی و ئەکادیمی ڤە گرنگیەکا پتر پێ بهێتە دان، لەورا گەلەکا گرنگە ئەم ل زانکۆیێ ڤان بابەتان بینینە پێشچاڤ، چونکو زانکۆ دەرگەهێ پێشڤەچوونا جڤاکی یە، هەروەسا زمانێ لەشی تا رادەیەکی یێ گرنگە بۆ چارەسەرکرنا گەلەک کێشێن دەروونی".

راگەهاندنا زانکۆیا دهۆک

فرمێسک حەسۆ