راگەهاندنا زانکۆیا دهۆک؛ ١٤ـی کانوونا ئێکێ ٢٠٢٢
نڤیسینگەها راوێژکاری یا کولیژا ئەندازیاری ل زانکۆیا دهۆک کۆربەندێ "ئاڤاهیێن بلند ل باژێرێ دهۆکێ (دیزاین و کوالیتیا جۆری) ب ئامادەبوونا سەرۆکێ زانکۆیا دهۆک و نوینەرێ پارێزگەها دهۆکێ و ژمارەکا ئەندازیارێن پرۆژان و بسپۆرێن زانکۆیا دهۆک و کۆمپانیێن تایبەتمەندێن ئاڤاکرنا تاوەران ل پارێزگەها دهۆکێ ئەنجامدا. د ڤی کۆربەندی دا، سێ پانێل ژ لایێ ئەندازیار و مامۆستایێن بسپۆرەڤە هاتنە ئەنجامدان.
ل دەستپێکا کوربەندی، سەرۆکێ زانکۆیا دهۆک د. داود سلێمان ئەتروشی، گۆتارەک پێشکێشکر و تێدا دیارکر "پێدڤیە زانکۆیێ رۆلەکێ کاریگەر د ئاڤەداناکرن و پێشڤەبرنا وەلاتی دا هەبیت، ب تایبەتی کولیژا ئەندازیاری، ژبەرکو ئاڤاکرنا تاوەران ئەزموونەکا نوی یە ل کوردستانێ ب گشتی و ب تایبەتی ژی ل دهۆکێ. ژبەر ڤێ چەندێ پێدڤیە کەرتێ تایبەت و لایەنێن پەیوەندیدار هەماهەنگەیەکا باش دگەل کولیژا ئەندازیاری، ب تایبەتی نڤیسینگەها راوێژکاری، هەبیت، داکو بشێن ب باشترین کوالیتی ئەڤ تاوەرە بهێنە ئاڤاکرن و د پاشەرۆژێ دا هیچ مەترسیەک ل سەر ژیانا وەلاتیان نەبیت".
پاشی راگرێ کولیژا ئەندازیاری ل زانکۆیا دهۆک د. جێمس حەسەدۆ حەیدۆ، ل دۆر سمینارەک ئاڤاهیێن بلند (تاوەرا) پێشکێشکر و ب ئامار باس ل ئاڤاکرنا وان تاوەرێن ل پارێزگەها دهۆکێ هاتینە ئاڤاکرن و د قۆناغا ئاڤاکرنێ دانە کر. ناڤبری ئاماژە ب وێ چەندێ کر کا ل دهۆکێ چەند پرۆژە هاتینە ئاڤاکرن و چەند د قۆناغا ئاڤاکرنێ دانە کو هەر پرۆژەک ژ ئێک تاوەر تاکو پێنچ تاوەر پێکدهێت و دیارکر "تانوکە ١٥ پرۆژە ل دهۆکێ هاتینە ئاڤاکرن و د قۆناغا ئاڤاکرنێ دانە، کو بلنداهیا هندەک ژ وان تاوەران زێدەترە ژ ١١٠میتران ل سەر رووبەرێ ١٣٨٠میترێن چوارگۆشە، کو هندەک ژ وان تاوەران دگەهنە ٣٢ تابقان".
د درێژیا سمینارا خۆ دا، راگرێ کولیژا ئەندازیاری ئاماژە ب وێ چەندێ کر کو گەلەک یا گرنگە (کۆد)ەکێ تایبەت هەبیت بۆ ئاڤاکرنا ڤان تاوەران و گرنگیەکا باشتر ژ لایێ زانستی ڤە ب دیزاین و هویربینیکرنا ئاڤاکرنا ڤان تاوەران بهێتە دان، گۆت ژی "پێدڤیە ب بەردەوامی هەر د قۆناغا ئاڤاکرنێ و پشتی ب دویماهیک هاتنێ ژی، تاوەر د بن چاڤدێریێ دابیت، پێخەمەت خۆپاراستنێ ژ پەیدابوونا هەر روویدانەکا نەخواستی".
ژ لایێ خۆ ڤە، رێڤەبەرێ نڤیسینگەها راوێژکاری ل کولیژا ئەندازیاری ل زانکۆیا دهۆک د. نەجدەت سەبری عبدولخالق، کو پشکداری پانێلەکێ کۆربەندی بوو، دیارکر "ب خۆشحالیڤە، تا نوکە هیچ ئاریشەکا مەزن و بەرچاڤ د ئاڤاکرنا ڤان ئاڤاهیێن بلند دا ل پارێزگەها دهۆکێ نەبوویە، بەلێ پێدڤیە ئەم پتر گرنگیێ ب بناغەیێ تاوەران بدەین. چونکی دبیت هەر ئاریشەکا د تاوەران دا هەبیت ژ لایێ کۆنکرێتی ڤە یان هەر بابەتەکێ دی یێ تاوەران بهێتە چارەسەرکرن، بەلێ ئاریشێن د بناغ هیچ چارەسەریەک بۆ ناهێتەکرن".
رێڤەبەرێ نڤیسینگەها راوێژکاری د درێژیا ئاخفتنا خۆدا ئاماژە ب وێ چەندێ ژی کر کو "پشتی هاتنا پرۆژان ژ وەبەرهێنانێ یان ژ باژێرڤانیان، پێدڤیە پشکنینا ئاخێ بۆ بهێتە ئەنجامدان، پاشی ل تاقیگەها دهۆک یا پشکنینا ئاخێ دێ ژمارا وان خالا دەستنیشان کەت کا ب چ شێوە پشکنین بۆ بهێتە کرن. هەروەسا ژ بەر مەترسیا بیڤەلەران پێدڤیە زۆنا وی جهی بهێتە دەستنیشانکرن، پێدڤیە پشکنین بۆ وی جۆرێ ئاخێ بهێتەکرن کا ئایا ئەو دیزاینا بۆ تاوەری هاتیەکرن دگەل دگونجیت".
هەروەسا ئەندازیار، دیار بحری رەشید، رێڤەبەرێ گشتیێ باژێرڤانیان ل دهۆکێ، سوپاسیا زانکۆیا دهۆک کر بۆ ئەنجامدانا ڤی کۆربەندی و دیارکر " گەلەک یا گرنگە زانکۆ پشکداریەکا کاریگەر د ڤێ ئەزموونا نوی یا ئاڤاکرنا تاوەران دا هەبیت، ب خۆشحالیڤە د ڤی کۆربەندی دا چەندین تێبینیێن گرنگ هاتنە دیارکرن ژ لایێن جودا ڤە، هەروەسا گەنگەشە ل سەر هەبوونا کۆدەکێ ئێکگرتی بۆ ئاڤاکرنا تاوەران ل پارێزگەها دهۆکێ هاتە کرن، ئەو تێبینیێن هاتینە دەستنیشانکرن دێ ل بەرچاڤ هێنە وەرگرتن".
هەژی ئاماژێ یە، سێ پانێل د ڤی کۆربەندی دا هاتنە پێشکێشکرن، پانێلێ ئێکێ ل دۆر پرسگرێکێن دیزاینی بوو. د پانێلێ دووێ ژی دا، کوالێتی و کوالێتی کۆنترۆل هاتنە گەنگەشەکرن. پانێلێ سێیێ ژی یێ تایبەت بوو ب چاڤدێریکرنا تاوەران و نەبوونا کۆدەکێ ئێکگرتی ڤە.