راگەهاندنا زانکۆیا دهۆک؛ ٢٨ـی چریا ئێکێ ٢٠٢٢
ژبەرکو چریا ئێکێ ب مەها بەلاڤکرنا هوشیاریا پەنجەشێرێ دهیتە زانین، کولیژا پزیشکی ل زانکۆیا دهۆک هەوەکا هوشیاریا پەنجەشێرا مەمکی ئەنجامدا و پەنەلکێ زانستیێ تایبەت ب ڤێ نەخۆشیێ ڤە سازکر.
ل ٢٠٢٢/١٠/٢٧ـێ، ل ناڤەندا قوتابیان یا زانکۆیا دهۆک، کولیژا پزیشکی یا زانکۆیا دهۆک و رێکخراوا IFMSA، ب هەڤکاری دگەل ئێکەتیا قوتابیێن کوردستانێ، پەنەلەکێ زانستی ل دۆر هوشیاریا پەنجەشێرا مەمکی ئەنجامدا
ل دەستپێکا چوونێ بۆ ناڤەندا قوتابیان ب مەرەما پشکداریکرنێ، لیژنا پێشوازیێ ب جلوبەرگێن ئێکگرتی پێشوازی ل مێهڤان و پشکداران کر و برۆشۆر و چاپەمەنیێن گرێدای ڤێ نەخۆشیێ ل سەر بەلاڤدکرن و پێزانینێن سەرەکی ل دۆر ڤێ ناخۆشیێ بۆ ڤەدگێران.
ل دەستپێکا پەنەلی، د. غەزوان فەوزی، نوینەرێ کولیژا پزیشکی د گۆتارا دەستپێکرنا پەنەلی دا گۆت "خۆشحالین ب ئەنجامدانا ئەڤێ چالاکیێ، سوپاسیا سەرۆکاتیا زانکۆیا دهۆک دکەین کو ب بەردەوامی پشتەڤانیا کولیژا پزیشکی دکەت بۆ ئەنجامدانا ڤان چالاکی و سمینارا بۆ زێدەتر هوشیارکرنا جڤاکی و هیڤیدارین بشێن ب رێکا ڤان پەنەلان هوشیاریا ساخلەمی ل دەف وەلاتیان پەیدابکەین". پاشی پەنەلی ب رێڤەبرنا د. شەنگ حسێن و ب ئامادەبوونا چوار پەنەلیستان دەستپێکر، ئەوژی د. حەسەن محسن نشتەرگەرێ گشتی، د. فاتما سالح تایبەتمەندا نەخۆشیێن سنگی، د. پەرژان هاشم تایبەتمەندێ نەخۆشیێن دەروونی و د. سوهەیب حەسەن تایبەتمەندێ تیشکێ و سۆنەرێ، و ب هویری باس ل ئەگەر و چارەسەری و خۆپارستنێ ژ پەنجەشێرا مەمکی هاتەکرن.
د ڤی پەنەلی دا، د. فاتما سالح ب درێژی باس ل ئەگەرێن زێدەبوونا پەنجەشێرێ کر، ب تایبەتی پەنجەشێرا مەمکی، دیار ژی کر "گەلەک جاران نەخۆش سەرەدانا مە دکەن هیچ نیشانەکا پەنجەشێرێ ل دەف دیار نینە، بەلێ ب مخابنی ڤە پشتی پشکنینان، دیار دبیت کو یا تووشی پەنجەشێرا مەمکی بووی".
پاشی تایبەتمەندێ تیشک و سۆنەرێ د. سوهەیب حەسەن باس ل گرنگیا ئەنجامدانا پشکنینان کر بۆ پاراستنا ساخلەمیا خو ب تایبەتی پشکنینا (میمۆگرافی)، کو تایبەتە ب پشکنینا مەمکی، ژبەر ڤێ چەندێ گەلەکا گرنگە پشتی ژیێ 40 سالیێ هەر ژنەک سەرەدانا نۆشدارێن تایبەتمەند بکەت و ئەڤێ پشکنینێ ئەنجامبدەت بۆ پشتراستبوونێ کو نەخۆشیە نینە".
ژ لایێ خۆ ڤە، د. حەسەن محسن نەشتەرگەرێ گشتی دیارکر "پشتی پێشکەڤتنا زانستی پێدڤی ب راکرنا ئێکجاری یا سنگی ناکەت، ژبەرکو گەلەک ب باشی و جوانی نەشتەرگەری بۆ سنگی دهێتەکرن، یان پارچەکا گەلەک بچویک یان بتنێ گرێیا بوویە پەنجەشێر دهێتە راکرن، بێی کو سنگێ ئافرەتێ جوانیا خۆ ژ دەست بدەت، چارەسەری بۆ تووشبوویێ دهێتەکرن".
ل دویڤ دا، د. پەرژان هاشم تایبەتمەندێ نەخۆشیێن دەروونی، باس ل کاریگەریا دەروونی ل سەر وان کەسێن تووشی پەنجەشێرێ دبن کر، ب تایبەتی ئافرەت، و راگەهاند "کەلتۆرەکی د ناڤ جڤاکی دا بەلاڤە، ئەوژی (پەنجەشێر ئانکو مرن)، هەر چەندە زانستی سەلماندیە کو رێژەکا باش ژ تووشبوویان دهێتە چارەسەرکرن، بەلێ ئەڤێ چەندێ کاریگەریەکا ئێکجار مەزن و خراب ل سەر وی کەسی هەیە دەما دزانیت کو تووشی پەنجەشێرێ بوویە".
ل دویماهیا پەنەلی، دانوستاندنەکا ڤەکری د ناڤبەرا پەنەلیست و ئامادەبوویان دا هاتەکرن، داکو هوشیاریا پەنجەشێرا مەمکی ل دەف ئافرەتان د ناڤ جڤاکی دا پتر بەلاڤ ببیت.
هەژی ئاماژێ یە، چریا ئێکێ ب مەها بەلاڤکرنا هوشیاریا پەنجەشێرێ ل سەرانسەری جیهانی دهێتە زانین، سالانە زانکۆیا دهۆک ب ڤێ هەلکەڤتێ بۆ زێدەتر بەلاڤکرنا هوشیاریێ، چالاکیێن جودا ئەنجامددەت.