ئەڤرۆ رێکەڤتی ٨ـی ئادارا ٢٠٢٣ ل سەنتەرێ کۆنفرانسان ل زانکۆیا دهۆک، و ب ئامادەبوونا سەرۆکێ زانکۆیا دهۆک د. داود سلێمان ئەتروشی، سەرۆکێ پەیمانگەها MERI و وەزیرێ پێشی یێ وەزارەتا خواندنا بلند و ڤەکۆلینێن زانستی د. دلاوەر عەلائەددین دیبەیتەک دگەل سەرۆک پشک و ئەندامێن جڤاتا زانکۆیا دهۆک ب ناڤونیشانێ "رێڤەبرن و سەرکردایەتی د خواندنا بلند دا" ئەنجامدا و تێدا راگەهاند "ژبلی پێشەنگی و کار و بەرهەمێن باش، مە چ ژ زانکۆیا دهۆک نەدیتیە، ئەڤ زانکۆیە یا بوویە جهێ دروستکرنا سەرکردا و هیڤیدارم ئەرکێ گرنگ دا بەردەوام پێشڤەبچیت".
ل دەستپێکا ڤێ دیبەیتێ، د. داود سلێمان ئەتروشی د پەیڤەکێ دا، پشتی بخێرهاتنەکا گەرم، باس ل رۆل و خزمەتێن د. دلاوەر عەلائەددینی کر و کار و بەرهەمێن وی وەکو وەزیرێ خواندنا بلند و هەروەسا وەکو سەرۆکێ پەیمانگەها MERI، سەرۆکێ زانکۆیا دهۆک ئەوژی دیارکر "ئەگەر ئەم ل چ پۆست و پلە بین، پێدڤیە بەردەوام هزربکەین ئەم قوتابینە و بەردەوام بزاڤێ بکەین فێری زانینێن نوی ببین، پێدڤیە راگر و سەرۆک پشک سەرکردە بن، ژبەرکو ئەرکێ وان گەلەکێ مەزنە و پاشەرۆژا دەهان هزار قوتابیا د دەستێ وان دایە".
د. دلاوەر عەلائەدین د ڤێ دیبەیتێ دا باس ل گرنگیا هەبوونا سازیەکا تایبەت یا پێگەهاندنا سەرکردا کر و خویاکر "چ سازیێن تایبەت ب دروستکرنا سەرکردان ڤە ل هەرێما کوردستانێ نینن، هیڤیدارم ئەم بشێین ژ دهۆکێ دەستپێبکەین و سازیەکا ب ڤی رەنگی دروستبکەین و خەلکی بەرەڤ سەرکردەیی یێ ببەین"، هەروەسا گۆت "راستە هندەک سەرکردە ژدایکدبن و هەر ل دەستپێکێ ساخۆلەتێن سەرکردا ل دەف هەنە، لێ ئەڤ یەکە پرۆسێسەکا پەروەردەکرن و پێگەهاندنێ یە".
د لایەکێ دیێ ڤێ دیبەتێ دا، د. دلاوەری هەڤبەرکرنەک د ناڤبەرا رێڤەبەری و سەرکردەی دا کر و دیارکر "رێڤەبەر گرنگیێ ل سەر بجهئینانا ئەرکا و کۆنترۆلا ستافی و پرۆسێسێن دبنە ئەگەرێ بەرهەمئینانێ دکەت. لێ سەرکردە شیانێن پەیوەندیکرنێ و دیدە و ئارمانجێن دۆمدرێژ ل دەف هەنە و گرنگیێ ددەنە پێگەهاندنا ستافی و حەز و پالدەرا ل دەف وان پەیدادکەت و پێدگەهینیت و دەلیڤێ ددەتە دەستپێشخەری و هزرێن وان ب مەرەما بجهئینانا وان ئارمانجان".
ل دویماهیا ڤێ دیبەیتێ، سەرۆک پشک و راگرێن کولیژان ل زانکۆیا دهۆک د بوارێن جودا دا پرسیار و بۆچوونێن خۆ ئاراستەکرن و دانوستاندنێن رژد ل دۆر ناڤەرۆکا بابەتی هاتنە ئەنجامدان.
راگەهاندنا زانکۆیا دهۆک؛ ٨ـی ئادارا ٢٠٢٣
عسمەت خابوور
فۆتۆ: محەمەد عەبدولکەریم، حسێن تتمی و هەرمان جانگیر