پێشانگەها "پەرتۆکەک وەلاتەکی ئاڤادکەت" ل زانکۆیا دهۆک هاتە ڤەکرن
June 15, 2023, 10:10 a.m.

ب ناڤونیشانێ "پەرتۆکەک وەلاتەکی ئاڤادکەت" ناڤەندا قوتابیان ل زانکۆیا دهۆک ل رۆژا ئێکشەمب رێكەڤتی ١٦ـی نیسانێ ٢٠٢٣، پێشانگەهەکا پەرتۆکا ب پشكداریا ٨ پەرتۆكخانا ھاتە ڤەكرن و دێ بۆ ماوێ ٤ رۆژان بەردەوام بیت. د پێشانگەهێ دا ب ھزارا پەرتۆك د بوارێن جودا دا و ب زمانێن جودا ھاتینە نیشاندان.

پێشانگەھ ژلایێ د. داود سلێمان ئەتروشی سەرۆكێ زانكۆیا دهۆک ڤە و ب ئامادەبوونا ھژمارەكا قوتابی و مامۆستا و ستافێ كارگێریێ زانكۆیێ ھاتە ڤەكرن، د پێشانگەھێ دا پەرتۆكێن ب زمانێن جودا و بوارێن جودا وەكو زمانڤانی، ئەدەب، فەلسەفە، دیرۆك، ھۆنەر، سیاسەت، گەشەپێدانا مرۆڤی، سایكۆلۆژی و...هتد ھاتینە نیشاندان، د. داود ئەتروشی د داخویانیەکێ دا بۆ دەزگەھێن راگەھاندنێ دیاركر کو ئارمانج ژ رێكخستنا ئەڤان پێشانگەھان نێزیككرنا قوتابیێ زانكۆیا دھۆكە بۆ پەرتۆكێ. سەرۆکێ زانکۆیا دهۆک هەروەسا ئاماژە ب بزاڤا وەرگێرانا پەرتۆكان ژ زمانێن بیانی بۆ زمانێ كوردی كر و دیاركر كو پێدڤیە مامۆستا و قوتابیێن زانكۆیا دھۆك گرنگیێ ب وەرگێرانا پەرتۆكان بدەن و پێدڤیە وان ھانبدەین بۆ كارێ وەرگێرانێ بۆ زەنگینكرنا پەرتۆكخانا كوردی.

ژ لایێ خۆ ڤە، د. نەبەز ئیبراھیم ھاریكارێ سەرۆكێ زانکۆیا دهۆک بۆ کاروبارێن قوتابیان دیاركر "ئەڤ پێشانگەهە ژ گەلەک لایەنان ڤە خزمەتا قوتابیان دکەت، ئێک ژ وان لایەنان ئەوە کو بوهایێن پەرتۆکان هاتیە کێمرن و قوتابی دشێت پەرتۆکان ئەرزانتر ژ بوهایێن بازاری بدەستڤەبینیت، هەروەسا قوتابی نەچار نابیت بچیتە بازاری بۆ بدەستڤەئینانا پەرتۆکان، دیسان ئەڤ پێشانگەهە هاندانەکە کو قوتابی گرنگیەکا پتر ب لایەنێ رەوشەنبیریا گشتی بدەت و بۆ کار و چالاکیێن خۆ یێن زانستی، وەکو راپۆرت و سمینار و پرۆژێن دەرچوونێ مفای ژ ڤێ پێشانگەهێ وەربگریت".

ئێك ژ خودانێن پەرتۆكخانێن پشكدار د پێشانگەھێ دا دیاركر کو پەرتۆكێن گەشەپێدانا مرۆڤی و ئایینی و رۆمان پتر دھێنە فرۆتن، ژبەركو بكڕێ پەرتۆكێ گەنجە و د ئەڤێ قوناغێ دا حەزا خۆ یا خواندنێ د ڤان پەرتۆكان دا دبینیت، و سەرەرای ھەبوونا پەرتۆكێن نڤێسەرێن كورد، لێ خواندەڤانی پتر حەز ل سەر پەرتۆكێن وەرگێرای ھەیە، ب تایبەتی ژی رۆمانێ.

راگەھاندنا زانكۆیا دھۆك؛ ١٦ـی نیسان ٢٠٢٣

راپۆرت: ماھر كێستەیی

فۆتۆ: محەمەد عەبدولکەریم