رۆژا شەمبیی رێکەڤتی ٢٤ـی ئەیلولا ٢٠٢٢ـێ ل هەولێرا پایتەخت، د. داود سلێمان ئەتروشی سەرۆکێ زانکۆیا دهۆک پشکداری د کونفرانسێ( بهێزکرنا سەروەریا یاسایێ دناڤ سازیێن خواندنا بلند دا)کر.

سەرۆکێ زانکۆیا دهۆک دگەل چەند سەرۆک زانکۆ و راوێژکار و مامۆستایێن زانکۆیێ د پانێلێ ئێکێ دا ب ناڤونیشانێن (یاسایێن خواندنا بلند دناڤبەرا جێبەجێکرن و هەولێن نویکرنێ دا) پشکداربوو و وەکو پانێلیست گۆتارەک پێشکێشکر و گۆت "هەر ل دەستپێکا دەستبکاربوونا من وەکو سەرۆکێ زانکۆیێ، هەمی پۆستێن چڤاتا زانکۆیێ هاتنە راگەهاندن لدویڤ وان مەرج و رێنمایان، هەمی کەسان ب یەکسانی مافێ پێشکێشکرنێ هەیە، کو ژ 19 راگر و 3 هاریکارێن سەرۆکێ زانکۆیێ پێکدهێن.

هەر د درێژیا گۆتارا خۆ دا، سەرۆکێ زانکۆیا دهۆک باس ل یاسایا وەزارەتا خواندنا بلند کر و گۆت "یاسایا خواندنا بلند یا ژمارە 8 یا سالا 2008ـێ نە یا سەردەمیانەیە بۆ پێشڤەبرنا خواندنا بلند یا ئەڤرۆ و پێدڤیە ب زویترین دەم بهێتە هەموارکرن، داکو زێدەتر دگەل پێدڤیێن ڤی سەردەمی و خواندنا بلند بگونجیت".

هەروەسا د. داود سلێمان سەرۆکێ زانکۆیا دهۆک، دیارکر "ڕۆلێ زانکۆیێ ب تنێ وەرگرتنا قوتابیان نینە و چوار سالا بروانامەیێ پێ بدەت، بەلکو زانکۆیێ رۆلەکێ مەزن و کاریگەر د جڤاکی دا هەیە، ب تایبەتی دەسنیشانکرنا ئاریشێن جڤاکی و حکومەتێ و کەرتێ تایبەت، دەربارەی ڤێ چەندێ مە وەکو زانکۆیا دهۆک پلان و ستراتیجیەکا تایبەت هەیە".

د دویماهیا پانێلی دا، ئامادەبوویان چەندین پرسیار لدۆر یاسایا خواندندنا بلند ئاراستەی پانێلیستان کرن و گەنگەشەکا تێروتەسەل لدۆر بهێزکرنا سەروەریا یاسایێ د ناڤ سازیێن خواندنا بلند دا هاتەکرن.

کۆنفرانسێ (بهێزکرنا سەروەریا یاسایێ د ناڤ سازیێن خواندنا بلند دا) ژلایێ رێکخراوا (چاوی زانکۆ) ب پالپشتیا سندۆقا نیشتیمانی یا ئەمریکی بۆ دیموکراسیێ، ل باژێرێ هەولێرێ هاتە ئەنجامدان.