ده‌نگوباس

شانده‌كێ زانكۆیا شه‌رنه‌خ یا توركی د سه‌ره‌دانه‌كێدا بۆ زانكۆیا دهۆك، داخۆازا گرێدنا په‌یوه‌ندییان كرن و لێك گوهارتنا چالاكیێن زانستی و ره‌وشه‌نبیری بۆ سالا نوو و خواست زانكۆیا دهۆك به‌شدار بیت دكونگره‌ێ ده‌ولیدا كو دێ هێته‌ گێران ل توركیا.

د. نه‌سیم دورو ژ زانكۆیا شه‌رنه‌خ كو پێك دهێت ژ كولیژا كارگێری وئابوری و ئه‌ندازیاری گوت "سه‌ره‌دانا مه‌ بۆ زانكۆیا دهۆك بۆ ژ نێزیك هه‌ڤناسین و لێك تێگه‌هشتنێ و شیانێن زانكۆیێ كا دێ شێت چه‌وان هاریكارییا مه‌ كه‌ت".

شاندێ زانكۆیا شه‌رنه‌خ كو ل مه‌ها كانونا دوێ 2010ێ سه‌ره‌دانا سه‌رۆكاتییا زانكۆیا دهۆك كرینه‌، هه‌ڤدیتنه‌ك دگه‌ل سه‌رۆكێ زانكۆیا دهۆك و ژماره‌كا ماموستایان كرن، نه‌سیم گوت "زانكۆیا مه‌ یا خۆ به‌رهه‌ڤ دكه‌ت بۆ گێرانا كونگره‌كێ زانستی یێ ده‌ولی ل مه‌ها ایار 2010ێ ئه‌م ژ به‌ر هندێ هاتینه‌ زانكۆیا هه‌وه‌ كا دێ چه‌وان شێین مفایی ژ شیانێن وه‌ بینین و به‌شدار بن د ڤی كونگره‌یدا".

دیسان خۆیا كر كۆ ئه‌ڤ كونگره‌ دێ  ل (14-15-16) ئه‌یار 2010ێ هێته‌ گێران، و نه‌سیم كۆ دگه‌ل هه‌ڤكارێ خۆ د.ئه‌جاقا ئه‌لنی هاتینه‌ كوردستانێ گوت "ئه‌م ب چاڤه‌كێ مه‌زن به‌رێ خۆ دده‌ینه‌ زانكۆیا دهۆك وسه‌ربلندین ب وی ئاستێ گه‌هشتیێ، ئه‌م ب هیڤینه‌ مفای ژ شیانێن ڤی زانكۆیێ بكه‌ین ل كونگرێ خۆ كۆ دێ نێزیكی 100 ڤه‌كوله‌ران تێدا به‌شدار بن".

سه‌باره‌ت ئه‌و ته‌وه‌رێن كونگرێ وان دێ گرنگیێ پێ ده‌ت گوت "چه‌وانیا مفا وه‌رگرتن ژ شیانێن ئه‌كادیمی چونكه‌ ئه‌م زانكۆیه‌كا نوو دروست بوینه‌، دیسان ژماره‌كا بابه‌تێن سیاسی و ئابوری دێ هینه‌ گه‌نگه‌شه‌كرن ودیسان 7 ماموستایێن زانكۆیا دهۆك دێ به‌شدار بن كا ب چ شێوه‌ دێ شێن هاریكارییا مه‌ كه‌ن، هه‌روه‌سا دێ زانكۆیا ئه‌مریكی ل سلێمانیێ به‌شدار بیت".

شاندێ ناڤبری خواست پروتوكوله‌ك بهێته‌ ئیمزا كرن دناڤبه‌را وان و زانكۆیا دهۆك بۆ هه‌ڤكاریكرنێ و ڤه‌كرنا به‌شه‌كێ زمانێ سریانی و كوردی ل زانكۆیا شه‌رنه‌خ و لێك گوهارتنا ماموستایان وبه‌شداری د چالاكیێن ئێك دوو دا، نه‌سیم ئاشكرا كر كو سه‌رۆكێ زانكۆیا دهۆك د.عسمه‌ت محه‌مه‌د خالد دێ سه‌ره‌دانا توركیا كه‌ت و زانكۆیا ناڤبری بۆ ئیمزاكرنا ڤی پرۆتوكولی دا هه‌موو تشته‌ك ببنه‌ كریار.
(راگه‌هاندنا زانكۆیا دهۆك)