به‌رپرسێ نوو یێ RRT یا ئه‌مریكی ل دهۆك سه‌ره‌دانا زانكۆیا دهۆك دكه‌ت

پشتی به‌رپرسێ به‌رییا نها یێ تیما ئاڤه‌دانكرنا هه‌رێمێ RRT یا ئه‌مریكی هاتیه‌ گوهارتن و به‌رپرسه‌ك نوو هاتی، بۆ ژ نێزیك تێكه‌لبوون و خۆ دانه‌ نیاسین شانده‌ك سه‌ره‌دانا زانكۆیا دهۆك دكه‌ت لرێكه‌فتی 6/6/2010، وبه‌رپرسێ بوری خواترا خۆ دخوازیت.

رێڤه‌به‌رێ RRT یێ نوو ل ئوفیسا دهۆك دانوستاندن دگه‌ل به‌رپرسێن زانكۆیا دهۆك كرن بۆ پێشكێشكرنا خزمه‌ته‌كا هه‌فپشك، وئاگه‌هدار بوون ل سه‌ر وان پرۆژێن به‌ریا نها ب هه‌ڤرا دگه‌ل زانكۆیا دهۆك ئه‌نجام داین وچه‌وانیا به‌رده‌وامی پێدانێ.

سه‌رۆكێ زانكۆیا دهۆك "د.عسمه‌ت محه‌مه‌د خالد" پێدڤیا زانكۆیا دهۆك بۆ ماموستایێن ئه‌مریكی دیار كر كۆ به‌ری نها گروپه‌ك هاتبوو كوردستانێ و كارێن وان ب داوی هاتن و پێدڤی ب شیانێن ژماره‌كا نوو یا ماموستایانه‌ ژ زانكۆیێن ئه‌مریكی بهێن و كورسێن تایبه‌ت ڤه‌كه‌ن بۆ قوتابیێن زانكۆیا دهۆك.

دیسان سه‌رۆكێ زانكۆیا دهۆك داخوازا پشته‌ڤانی كر، كۆ پشكه‌كا خواندنێن ئه‌مریكی ل زانكۆیا دهۆك بهیته‌ ڤه‌كرن ل سه‌ر ئاستێ ماسته‌ر و دكتورا، دیسان ژێ خواست پشته‌ڤانیا زانكۆیێ بكه‌ن بۆ سازكرنا كونفرانسه‌كێ تایبه‌ت ل دۆر ئاڤاكرنا ئاشتیێ، كۆ دێ زانكۆیا دهۆك پێ رابیت و ژماره‌كا مه‌زن یا مێهڤانان لێ به‌شدار كه‌ت ژ كه‌سانێن بسپۆر و زانكۆیێن جیهانی وهه‌رێمی وده‌ورو به‌ر ل بوهارا سالا 2011 دێ ده‌ست ب كاربیت.

دهێته‌ زانین كۆ زانكۆیا دهۆك وتیما RRT چه‌ندین پرۆژێن گرنك پێكڤه‌ ئه‌نجام داینه‌ و ل ڤێ داوێ به‌شدار بوون د دانانا سه‌نته‌رێ توفل دا و ڤه‌كرنا خولێن فێربوونا زمانێ ئنگلیزی بشێوه‌كێ ئه‌كادیمی و چه‌ندین پرۆژێن دن یێن گرنگ.