"جیاوازى نێوان ناوى درژراو وگرێ له‌ زمانى كوردیدا"

ل رۆژا پێنج شه‌مبى رێككه‌فتى (28/1/2010) ل هۆلا بنگه‌هێ روشنبیرى وجڤاكیێ زانكۆیا دهۆكێ ژلایێ لیژنه‌كا بسپور وتایبه‌تمه‌ند دبیاڤێ زمانێ كوردى دا گه‌نگه‌شه‌ هاته‌ كرن لسه‌ر ڤه‌كولینا قوتابى "حكمت ره‌سول محه‌مه‌د" ل كولیژا ئادابێ یا لژێرناڤێ (جیاوازى نێوان ناوى درژراو وگرێ له‌ زمانى كوردیدا) كو ل ژێر سه‌رپه‌رشتیا (د.باییز عمر) ماموستا ل كولیژا ئادابێ هاتبوو ئه‌نجامدان.

قوتابیێ ڤه‌كوله‌ر (حكمت) دپێشه‌كى یا ڤه‌كولینا خودا ئاماژێ ب گرنگى یا ڤه‌كولینێ دا وگوت "گرنگیا ناڤه‌روكا ڤێ ڤه‌كولینێ دوێ چه‌ندێ دایه‌ كو لسه‌ر ئاستێ مورفولوژى و سینتاكسێ كار هاتیه‌كرن بۆ ده‌رخستنا جیاوازیێن دناڤبه‌را ناڤێ دارژراو وگرێ ب گشتى وگرێ یا ناڤى بتایبه‌تى دهه‌ردوو دیالێكتێن كرمانجى یا خوارێ و سه‌رى یا زمانێ كوردیدا.
زێده‌ بارى هندێ كو ئه‌ڤ نامه‌ ب شێوه‌كێ هویرتر باس ل یاسایێن رۆنان وپێكهێنانا ناڤێ دارژراو و گریێ دكه‌ت د هه‌ر دوو دیالێكتاندا.

هه‌ر ل دوور مه‌ودا وسنورێن ڤێ ڤه‌كولینێ هه‌ژییه‌ بێژین كو ئه‌ڤ ڤه‌كولینه‌ ب ره‌نگه‌كێ گشتى بۆ دیاركرنا جیاوازیێن دناڤبه‌را ناڤێ دارژراو وگرێ یا ناڤێ هاتیه‌ ته‌رخانكرن و كه‌رستێ وێ ژى ژ ئاخفتنا رۆژانه‌ یا دیالێكتا كرمانجى یا سه‌رى و كرمانجى یا خوارێ ها تیه‌ وه‌رگرتن.

پشتی دان وستاندن ل سه‌ر ڤه‌كولینا ناڤبری هاتیه‌ كرن لدویڤ هه‌لسه‌نگاندن وبریارێن لیژنا بسپور و تایبه‌تمه‌ند بریار هاته‌ دان پلا ماسته‌رێ ب قوتابی بهێته‌ دان.